2. Dificultades do ensino das linguas extranxeiras

Como sabemos, ser docente hoxe en día non é unha tarefa sinxela de coser e cantar, xa que require de moito interese, esforzo, ganas, vontade e duro traballo para alcanzar os obxectivos que queremos para con o noso alumnado e sacarlle o máximo partido ao seu potencial. No contexto aula o docente de lingua estranxeira pódese atopar con diferentes dificultades. En primeiro lugar, poden xurdir problemas e limitacións da situación actual, como as expectativas dos obxectivos fixados tanto pola Unión Europea como pola Estado español no proceso de converxencia: mobilidade, desenvolvemento tecnolóxico, calidade, multilingüismo e plurilingüismo. De seguido, tamén poden xurdir problemas como resultado da idade e madurez do alumnado da Educación Secundaria Obrigatoria, así como da situación familiar e os desequilibrios económicos e sociais que se poidan dar de xeito individualizado. Esta última dificultade constitúe un factor clave para o propio benestar e motivación do alumnado para que sexan capaces de sacarlle o máximo partido posible á súa etapa educativa, por iso é imprescindible traballar conxuntamente cas familias e axudar ao alumno na medida que nos sexa posible como docentes. Tanto os problemas de saúde como as dificultades de aprendizaxe ou situacións de diversidade funcional tamén poden ocasionar dificultades á hora de desenvolver a acción docente. Ademais, a necesidade de conseguir resultados externos contrastables nun contexto competitivo, as condicións do mercado de traballo que demandan un coñecemento práctico e eficaz dunha lingua estranxeira, a competencia de métodos informais e transversais de aprendizaxe de linguas e a presión doutros bloques lingüísticos no contexto do mundo global, poden supoñer outra serie de problemas ou dificultades no desenvolvemento da función docente. Por último, tamén se pode comentar o emprego das novas tecnoloxías como dificultade no ensino, xa que existen casos nos que non se dispón de material ou coñecementos suficientes para desenvolver correcta e satisfactoriamente a función docente.

Todas estas dificultades poden supoñer un desafío e un reto para todo docente, pero quizás unha das problemáticas que máis preocupa a un novo profesor sexa a idade e a madurez do alumnado da etapa educativa da Educación Secundaria Obrigatoria. Neste período vital, os adolescentes sofren unha serie de cambios tanto físicos como cognitivos que influirán no seu desenvolvemento educativo e que, por suposto, os docentes temos que ter en conta. Algúns destes cambios na súa dimensión cognitiva son, entre outros, que cambian o xeito de procesar a información, o desenvolvemento do pensamento formal, o desenvolvemento do pensamento hipotético-dedutivo, o desenvolvemento da metacognición e, por último, acontece a poda sináptica¾isto é, elimínanse conexións sinápticas entre neuronas para así aumentar a concentración en tarefas que requiran unha maior complexidade.

Todos estes cambios poden supoñer aspectos positivos que poderemos aproveitar para a adquisición de competencias e o desenvolvemento do seu proceso educativo. Non obstante, esta evolución na vida e conformación da personalidade do adolescente, poden carrexar aspectos negativos que poden repercutir no contexto aula. Os adolescentes adoitan atopar defectos nos seus pais e noutras figuras de autoridade, como neste caso pode ser o docente, ten tendencia a discutir e a estar en desacordo continuamente, pensan que a familia non os entende, senten indecisión continua, e ocorre a exaltación da audiencia imaxinaria e a fábula persoal. 

            

Ante esta problemática, pódense adoptar diferentes actitudes para emendar ou tentar solucionar as posibles situacións conflitivas que poidan darse na aula debido a estas conductas adolescentes. A actitude do docente ten que ser flexible, sempre dependendo do caso individual do que se trate, pero, de xeito xeral, pode adoptar unha actitude de escoita, proximidade e comprensión ante o alumno. Desta maneira, trataremos de que o alumnado non estea á defensiva e darémoslles a entender que estamos para axudalos no que necesiten. Ademais, outra posible solución aplicable na aula pode ser o emprego das novas tecnoloxías para así sacalos da rutina e monotonía da metodoloxía de sempre e, deste xeito, fomentar as súas ganas e motivación. 

Aínda que, como vimos, existen diferentes dificultades e problemas que poden afectar á función docente, algunhas poden ser máis ou menos importantes dependendo do grao no que acontezan ou dependendo tanto do «suxeito» como do «predicado». É imprescindible traballar ca problemática da idade e da madurez debido á etapa evolutiva e cambiante que están a vivir o noso alumnado, xa que están evolucionando cara a persoa formada e educada que van a ser o día de mañá. Nós como docentes seremos un factor determinante para axudalos a crecer día a día e conformar satisfactoriamente a súa personalidade. 

Referencias:

•   Carretero, M. y León J. A. (1990). Desarrollo cognitivo y aprendizaje en la adolescencia. En Palacio, J. (comp.), Marchesi, A. (comp.) y Coll, C. (comp.), Desarrollo psicológico y educación (vol. I, 311-326). Madrid: Alianza Editorial. [consultado o 3 de decembro 2017]. Recuperado de: https://mcesuvaq.files.wordpress.com/2013/08/8-desarrollo-cognitivo-y-aprendizaje-en-la-adolescencia.pdf
•   Lara, J. M. (1996). Adolescencia: cambios físicos y cognitivos. Ensayos: Revista de la Facultad de Educación de Albacete, 11, 121-128. [consultado o 3 de decembro 2017]. Recuperado de: https://dialnet.unirioja.es/servlet/articulo?codigo=2282696
•   Pérez, J. (2010). Los profesores de lenguas extranjeras ante el reto de la globalización. Centro Virtual Cervantes. [consultado o 3 de decembro 2017]. Recuperado de: https://cvc.cervantes.es/ensenanza/biblioteca_ele/aepe/pdf/congreso_45/congreso_45_46.pdf