4. Dosier: O deseño curricular

Con esta entrada, dámoslle a benvida a unha serie de entradas baixo a etiqueta de «dosier», no que se presentarán os resultados finais das tarefas realizadas na aula da materia «As linguas estranxeiras no contexto español e internacional» impartida polo docente Gonzalo Constenla. A sesión que se vai comentar a continuación é a do día 28 de novembro, a primeira clase con Gonzalo, polo que unha primeira parte de clase dedicouse á presentación do docente, os contidos que impartiría, os traballos que deberiamos realizar e, por último, os métodos de avaliación.

Para comezar propiamente a clase, propúxonos unha actividade de debate chamada «a pirámide». Esta tarefa consiste nunha actividade de fala na que, para comezar, só falan de dous en dous, despois xúntanse dous grupos de dous e falan catro, despois xúntanse dous grupos de catro e falan oito, e así sucesivamente creando grupos máis e máis grandes ata chegar a debater a aula ao completo. Neste caso, a tarefa que se nos encomendou foi debater sobre cal opinabamos que era o tema máis importante e interesante da materia que nos faltaba por ver. As opcións eran as seguintes:
- O deseño curricular.
- As programacións didácticas vixentes.
- Seccións bilingües e plurilingües. Metodoloxía CLIL/AICLE. Os proxectos lingüísticos de centro (PLC).
- Metodoloxías en Europa e no mundo. 

No grupo de dous, decidimos que o tema máis interesante e útil para nós como futuros docentes era o das programacións didácticas vixentes, xa que pensamos que é imprescindible controlar a elaboración destas programacións para sacarlle o maior proveito posible ao tempo que temos para impartir os contidos que nos obriga a lei. Así mesmo coincidiron e pensaron as outras dúas compañeiras coas que debatemos na seguinte etapa da tarefa. Sen embargo, cando chegamos a etapa de debate na que participabamos oito persoas (a etapa previa ao debate común de toda a aula) xa apareceron os primeiros desacordos, xa que algunhas das nosas compañeiras opinaban que o tema máis importante era coñecer as metodoloxías que están vixentes e se empregan noutros sistemas educativos de éxito de Europa ou do mundo. Cando chegamos ao debate final con toda a clase, comparamos todas as nosas opinións e nutrímonos de todas e cada unha das diferentes ideas e argumentos que cada un de nós expresou. Pareceume unha actividade útil na que o alumnado non só desenvolve as súas capacidades cognitivas, senón que tamén desenvolven as súas capacidades sociais ao estar en continuo contacto e debate cos compañeiros. Ademais, tamén se fomenta o espírito crítico e o respecto, xa que é posible defender as propias ideas con duros argumentos pero sempre sabendo respectar a opinión do compañeiro.

A continuación, realizamos unha tarefa que foi a previa para a seguinte que realizariamos: en grupos de 4 debatemos algúns puntos principais do tema 4 relativo ao deseño curricular, como a definición de currículo, os elementos curriculares ou as competencias do currículo. Isto deu pé a refrescar a memoria con respecto a estes conceptos, coma unha avaliación inicial, para continuar de seguido cunha actividade na aplicación Kahoot!. Kahoot! trátase dunha aplicación gratuíta que permite crear cuestionarios nos que o docente actúa como moderador e o alumnado cos seus dispositivos móbiles contesta ás preguntas pertinentes. Este recurso gamificante permite que o alumando aprenda xogando, facendo máis amena e divertida clase e aumentando a súa motivación para así tentar gañar. Ademais, tamén é un xeito de fomentar a cooperación e o traballo en equipo, xa que a aplicación permite o modo equipo. Persoalmente, pareceume unha forma máis divertida e diferente de repasar todos os conceptos relativos ao currículo e, por suposto, moito mellor que o emprego de outras técnicas menos participativas e activas.  

Despois, fixemos unha actividade conxunta entre todos en Google Docs, no que o docente repartiu a cada grupo de traballo un punto fundamental dos contidos para cubrir no documento. Estes contidos tamén eran relativos ao tema 4, no que se fala do deseño curricular, máis concretamente das linguas estranxeiras no contexto da LOMCE. Deste xeito, tamén se fomentou o traballo cooperativo e en equipo para despois comentar toda a aula en común cada un dos puntos.

E, por último, para rematar as actividades deste tema 4, volvemos empregar a aplicación Kahoot! para traballar a temática do currículo das linguas estranxeiras nas ensinanzas de réxime especial, é dicir, as Escolas Oficiais de Idiomas e con ela, aprendemos moitísimo acerca delas no caso de que no noso futuro queiramos dedicarnos a este ámbito tan amplo e interesante.

En conclusión, pareceume unha clase moi divertida, diferente e interesante, debido ás innovacións aplicadas na metodoloxía. Deste xeito, estivemos tratando moi en profundidade o tema do deseño curricular, adquirindo e aprendendo os conceptos pertinentes e fundamentais case sen darnos conta, dun xeito participativo, activo e, sobre todo, motivador.

Algúns enlaces de interese:
        - https://www.teachingenglish.org.uk/article/pyramid-discussion
        - https://kahoot.it/