3. O ensino das linguas estranxeiras por proxectos

Como xa se mencionou na entrada relativa ao Marco Común Europeo de Referencia para as linguas, un novo xeito de traballar nas aulas que está á orde do día é empregando proxectos. Este novo modelo nas aulas consiste en propoñer ao alumnado a realización dun proxecto de investigación ou desenvolvemento cuns obxectivos concretos que deben alcanzar. Eles mesmos deben ser os protagonistas da súa aprendizaxe, onde aprenden a aprender, desenvolven a súa autonomía, obteñen información, organízanse e son quen de solucionar con éxito o problema presentado. O desenvolvemento de tarefas por proxectos conta con moi importantes vantaxes para os estudantes. En primeiro lugar, permite que o alumnado traballe de forma multidisciplinar, xa que poden traballar contidos e competencias de diferentes materias e, ademais, melloran capacidades cooperativas, colaborativas e organizativas. Grazas a este desenvolvemento das súas capacidades cooperativas e colaborativas, foméntase o exercicio das súas destrezas sociais, xa que teñen que relacionarse cos seus compañeiros, debater, argumentar, ter espírito crítico, respectar e poñerse de acordo. A maiores, tamén se fai uso das novas tecnoloxías como ferramenta imprescindible para o desenvolvemento deste tipo de traballos por proxectos mentres que o alumnado exercita a súa competencia dixital e mellora a súa destreza cas TICs. Outra das vantaxes máis destacables é que o alumnado afianza moito mellor os coñecementos, xa que responsabilízase do seu propio aprendizaxe, como se comentou anteriormente, e non realiza un mero exercicio de memoria, senón de relación e asimilación. E, como consecuencia de todas estas, comprobouse que lles sirve de preparación para a súa futura vida tanto persoal como profesional, xa que lles aporta autonomía persoal, capacidade de resolución de conflitos e confianza neles mesmos. 

Para a creación dun traballo por proxectos que o alumnado atope motivador e interesante, debemos ter sempre en conta as súas inquedanzas e gustos e asegurarnos de que o traballo non lle suporá unha situación de tedio e amargura, senón de aprendizaxe e entretemento. Neste caso, baseei a miña elección na unidade 5D do libro de inglés New English File de Oxford dun nivel pre-intermedio para o curso de 2º da ESO titulada «The name of the game», que trata o tema do deporte. Como vemos na imaxe, no ensino por proxectos queremos escapar deste tipo de actividades mecánicas nas que soamente hai que mirar fotografías ou memorizar preposicións. Por iso, a tarefa alternativa que proporei será a celebración dunhas Olimpíadas. 

Para comezar, faremos na clase un brainstorming propoñendo e votando ata 5 deportes de equipo diferentes que conformarán as diferentes probas para as Olimpíadas. A continuación, sempre tendo en conta a atención á diversidade, crearanse 5 grupos diferentes e cada un deles encargarase de investigar en inglés as normas, a historia e a orixe de cada deporte, sendo así unha tarefa totalmente transversal. Despois, prepararán unha exposición tamén na lingua estranxeira para que os outros equipos entendan como se xoga a ese deporte do que fala o grupo expositor. Ademais, poderán adestrarse nestes deportes na materia de Educación Física durante un período medio de tempo para, así, alcanzar unha preparación satisfactoria fronte a gran día das Olimpíadas. Para engadirlle un factor contextual real, nós como docentes poderemos contactar cos medios de comunicación da cidade para que os propios alumnos lles fagan saber o proxecto que eles mesmos están a realizar.

No que respecta á avaliación, como nos demais casos, empregarase unha rúbrica ou grella de avaliación, na que os elementos fundamentais que se terán en conta serán tanto a gramática e a correcta ortografía dos traballos, a boa exposición e explicación dos deportes, os contidos e a profundidade coa que se tratou a investigación que se levou a cabo e a participación positiva e activa para coa a tarefa.

Como conclusión, podemos dicir que neste caso traballar por proxectos carrexa non só o alcance satisfactorio e con éxito dos contidos da materia de inglés como o emprego das preposicións pertinentes, os verbos de movemento, a expresión das normas dos deportes, a práctica da fluidez oral ou a adquisición de vocabulario específico de deportes, senón que o alumnado desenvólvese tamén transversalmente en contidos de materias como a historia ou a xeografía, así como nas súas competencias sociais e cívicas grazas ao traballo cooperativo e colaborativo e aos deportes en equipo. Por último pero non por iso menos importante, con esta tarefa tamén fomentamos un estilo de vida activo e saudable coa que tanto hai que concienciar hoxe en día aos nosos adolescentes. 

Referencias:

·        Cortés, A. (2014). El nuevo currículo LOMCE y el trabajo por competencias. Fórum Aragón, 12. [consultado o 4 de decembro 2017]. Recuperado de: https://dialnet.unirioja.es/descarga/articulo/4754426.pdf 

·        Ministerio de Educación, Cultura y Deporte. Competencias clave. [consultado o 4 de decembro 2017]. Recuperado de: https://www.mecd.gob.es/educacion/mc/lomce/el-curriculo/curriculo-primaria-eso-bachillerato/competencias-clave/competencias-clave.html

·        Oxenden, C., Latham-Koenig, C. y Seligson, P. (2005). New English File: Pre-intermediate Student’s Book. Oxford: Oxford University Press.